لبنان أرضْ الرّب، لبنان ما بيموت، لبنان رَحْ يبقى، لبنان رَحْ يقوم، رَحْ يقوم بإيمان وارادة وعزيمة كلّ واحد منا.ـ
لما منكون صوت الله، حاملين كلمتو، كلمة المحبّة، بتعبير آخر، لمّا منعيش المحبة اللي بتفترض إحترام كيان وكرامة وحقوق كلّ انسان، المحبة اللي بتفترض الخدمة والتضامن والمسامحة والسعي للسلام، ساعتها منساهم بقيامة وخلاص لبنان.ـ
ومن إيماننا بالرّب اللي منترجمو بهالمحبة: محبتنا إلو ولخيّنا الإنسان، بتولد محبّة الوطن، محبّة الوطن، الوصيّة اللّي عطاها المكرّم البطريركالياس الحويّك لأبناء الوطن "بمنشور محبة الوطن سنة 1930"، بقلّنا:ـ
"علينا أن نحبّ أبناءَ وطننا ونعيش معهم بسلام ووئام. علينا أن نحبّ الموتى والأحياء منهم. فقد أعْطوْنا حياتهم وجاهدوا من قَبْلنا في الدّفاع عن الوطن، فماتوا في الوديان والحقول، فلنكرّم الأرض ونحبّ الأرض وندافع عن الأرض التي ضمّت رُفاتَهم..."ـ
رسالة اليوم، هييّ دعوة لنوجّه أنظارنا نحو السما وناشد الرّب بقلب واحد:ـ
يا ربّ، انت اللّي زرت أرضنا وباركت ترابنا وتاريخنا، عينك علينا وعلى وطننا لبنان، خلّصنا يا ربّ، عطينا شجاعة قبول نعمة الإيمان، الإيمان اللي هوّي مصدر كلّ محبة: محبتك، محبة خيّنا الإنسان ومحبة الوطن،هالمحبّة الليّ هييّ القوة الأقوى للصمود والإندفاع لبناء لبنان، وطن الحريّة والقانون، وطن الرسالة: رسالة الحق والسلام، وعطي يا ربّ الحياة الأبديّة لكلّ شهداء الوطن، الشهدا اللّي حبّوا الوطن حتى الإستشهاد وهنّي بربيع العمر تتبقى الهويّة ويبقى الوطن.ـ
