Messages Du Lundi
13/01/2020

الإثنين 13 كانون الثاني 2020

 

"السلام قَيّم للغاية"

 

بها العبارة استهّل قداسة البابا فرنسيس أوّل مقطع من رسالتو بمناسبة الإحتفال باليوم العالمي للسلام 1 كانون الثاني 2020.ـ

 

السلام قيّم للغاية" عبارة بتعني انّو السلام مهمّ وضروري جدّا لدرجة ما فينا نستغني عنّو لأنّو بدونو منكون عمّ مندمّر مشروع الأخوة اللّي بتضمّنو رسالة العيلة البشريّة.ـ"

 

مشروع الأخوّة اللّي هوّي من اسّس مشروع الخلاص اللّي حققّوا يسوع المسيح بتجسّدو وولادتو كإنسان بعيلتنا البشريّة، واقوالو واعمالو، وموتو وقيامتو من بين الأموات.ـ

 

سوا خلال هالشّهر الأّوّل من سنة 2020 منطلب من الرّب الشجاعة لقبول نعمة السلام الدّاخلي، سلام القلب، سلام المسيح تنقدِر نكون بناة وصانعي سلام بقلب مجتمعنا.ـ

 

هالنعمة، سلام القلب، كلنا بأمسّ الحاجة إلها لتنتفادى ويلات الحروب، لأنّ مِتلْ ما بقلّنا قداسة البابا فرنسيس، بأغلب الأحيان، بتولد الحرب بقلب الإنسان، من الأنانيّة والكبرياء والكراهية اللّي بتدّمر وبتسجن خيّنا الإنسان بصورة سلبية وبتجرّب تلغي.ـ

 

نحنا بأمسّ الحاجة لنعمة سلام القلب تنقدر نعترف ببعضنا كأخوة وكل واحد منّا يشوف بخيّو الإنسان "هديّة من الرّب" تيبني معو باستمرار وبمسؤولية طريق السلام للمجتمعات وللبشرية.ـ

 

نحنا بأمسّ الحاجة لسلام القلب تنقدر ننفتح على الآخر بالحوار المسؤول والمرتكز على الإصغاء والإحترام المتبادل، ومن خلالو نتفادى النزاعات والحروب اللّي ما ببترك وراها إلاّ المعاناة واليأس والدّمار.ـ

 

نحنا بأمسّ الحاجة لسلام القلب تنكون شهود للمسيح ورسل على مثال يوحنا ساعيين لبناء طريق السلام وتحقيق مشروع الأخوّة بلبنان والمنطقة والعالم.ـ

فيا ربّ السلام أمطر علينا السلام.ـ

 

 

اسبوع مبارك                                                                                                                    

المديرة الأخت ميرنا شيبان                                                                                                              

Articles Liés